قصة هدى خريجة تمريض

اعرفكم بنفسي انا اسمى هدى خريجه تمريض بشتغل ممرضه فى مستشفى خاصه طبعا طبيعه عملى بتخلينى اسهر بره كتير. دايما بنتجمع انا واصحابى قدام المستشفى ونمشي ممر كبير الممر ده على طول ضلمه مفيهوش نور خالص سمعت من ممرضات زمايلنا ان الممر ده ماتت فيه تمرجيه اسمها عديله كانت بتمسح أرضيه الممر ده وكان فيه سلك كهرباء مرمي على الارض وماتت متكهربه.

بس الاقاويل على الممر ده كتير اوى فيه منهم بيقولوا ان روح عديله بتظهر للناس اللى بتمشي فى الممر ده وتنتقم منهم وناس تانى بتقول ان روح عديله شريره بطبعها وبتقتل وخلاص والروايات كتير قوي وكل واحد بيحكيها على مزاجه.

كنا كل يوم الساعه 11 بنتجمع كلنا ونمشي الممر لحد ما نتطلع على المستشفى طبعا مبيكونش فيه خوف اوى عشان كلنا مجموعه. بس المشكله جت فى يوم صحبتى رحاب اعرفكم بيها دى اعز اصحابى ومش صحبيتى وبس دى كمان جارتى المهم رحاب اتصلت بيا وقالتلى انتى فين يا هدى اتاخرتى اوى وكلنا اطرينا نطلع على المستشفى معلش والله بس انا قولتلهم نستناكى بس انتى اتاخرتى اوى.

وصلت ووقفت قدام الممر بصراحه كنت خايفه ادخله لوحدى بس قعدت اشجع نفسي واقول الممر مفيهوش حاجه تخوف وده كلام يعنى بيتقال والناس مبتصدق تقول اى حاجه ودخلت الممر.

مشيت ومفيش أى حاجه وصلت لنصه بس حصل حاجه غريبه سمعت صوت بينادى عليا انا قولت دول اكيد اصحابى وبيخوفونى مشيت وعملت نفسي مش واخده بالى عشان ميتريقوش عليا واول مطلعت وشوفتهم قولتلهم خلاص افتكرتوا كده ان انتوا خوفتونى لقيتهم بصوا لبعض واستغربوا كلامى قالولي هوا فيه ايه ؟؟ قولتلهم ايوا استعبطوا بقى وخدت الموضوع بضحك.

تانى يوم وصلت برضه متاخره يوووه بقى هو انا كل يوم كده هفضل ادخل الممر ده لوحدي المهم دخلت وسمعت نفس الصوت اتعصبت اوى وقعدت اقولهم بطلوا هزاركم البايخ ده خلاص انا خوفت حرام عليكم اسكتوا بقى وطلعت من الممر واول ما شوفت اصحابى قعدت ازعق فيهم بس هما كانتوا مستغربينى اوى ومفيش حد اهتم بكلامى والوحيده اللى اهتمت بكلامى رحاب وقالتلى ايه اللى حصل بالظبط ؟؟