_يعني حضرتك عاوز تجوزني ابنك الي كان بيحب واحده اكبر منه ب25 سنه!!
_الله ينتقم منك
ضحكت ودخلت غيرت ولبست بيجامه وطلعت كان هو غير ولبس بيجامه هو كمان وماسك نفس العلبه وبيقرأ في الورق من تاني!
روحت وقعدت قدامه وفضلت بصاله
_مش هتسألي؟
=لو حابب تتكلم ف انا حابه اسمعك
اداني العلبه ف استغربت هو مش هيقولي متدخليش في الي ميخصكيش ويزعق!
بدأت اقرأ الورق
الورقه الأولى
( ابقى روح ل دار الايتام الي جمبنا مره في الأسبوع وفرح الأطفال الي هناك )
الورقه التانيه
( كل سنه وانت طيب كملت النهارده 26 سنه والعمر كله في سعاده يرب )
الورقه التالته
( هقولك على حاجه اعتبرها وصيتي او زي متفكر، لو مت بليل متدفنيش الا الصبح، انا بخاف من الضلمه اوي، انا عارفه انك بتفضل تصبرني بس خلاص المرض وصل ل اخر مرحله، تعرف محدش هيوحشني قدك حتى ولادي مش بشوفهم الا في السنه مره دا لو شوفتهم، انت الي على طول معايا )
الورقه الرابعه
( لما تيجي تزورني اما امشي هاتلى ورد بنفسجي عشان بحبه ومتستخسرش ها متستخسرش )
كنت بقرأ وانا قلبي وجعني وبصتله لقيته بيعيط
_دي الي كنت بتحبها؟
=..
_تعرف يا احمد، انت حبيتها يمكن عشان مفتقد احساس الامومه فشوفت فيها مامتك بس ترجمت شعورك دا غلط، هي كانت بتحبك زي ابنها واكتر، ربنا يرحمها هي في مكان احسن دلوقت، واكيد شيفاك وزعلانه انك حزين كده
=..
_انت مش بتفتح الشبابيك عشانها؟
=كنت بفتحها عشان اشاورلها في أول اليوم قبل مروح الشغل، هي دلوقت مش موجوده يبقى ملهاش لازمه تتفتح
_ومين قالك كده؟ بالعكس دا انت تفتكرها اكتر، ربنا يرحمها
حضنته مهو يجماعه اقسم بالله مابعرف اواسي الي هو انت زعلان؟ طب هات حضن
طلع من حضني وهو مبتسم
_انتي طيبه اوي يمريم
=ايوه عارفه
_قومي من جمبي يمريم
=احمد متبقاش قفوش كده!
قعدنا نتكلم يومها كتير، كتير اوي منمناش تقريبا الا الساعه خمسه، طلع لطيف وكان بيعمل الشويه دول عشان اكرهه بس ميعرفش اني استلطفته من اول يوم شوفته فيه! وانه الله وكيل احلى من اي فتى احلام رسمته في خيالي، هو اه كان مخلي كرامتي محتاجه نقل دم بس عرفت الحقيقه واخيرا فهمته
نمنا شويه وصحيت لقيته جمبي ايدا اي الوقاحه دي؟ اي الطريقه دي، ايدا اي الجمال دا يخربيتك!
قومت ونزلت حضرت الفطار وكنت ماسكه طبق لفيت لقيته في وشي ف وقع مني اتكسر
_منك لله متقفش قدامي في حته تاني
=لي؟
_لما بشوفك بتلخبط يخربيت كده
=ايدا اي الكلام دا
_كلام اي انا خارسه!
فتحنا الشبابيك وابتسمتله الي هو طب والله جوزي وكفاءه
