الست جارتنا
وانا فضلت ارتب في الشقه شويه وعيني كل شويه تيجي ناحية الشباك عايزة ابص عليها ؟! يا ترى لسه واقفه وبصالي ؟ ولا كان بيتهيئلي الفضول كان هيموتني وعايزة اكسر الخوف اللي بقى مليني من جوه.. قربت من الشباك بالراحة ومسكت الستارة وفتحتها سنة عشان أبص منها مالقتهاش واقفه على شباكها قفلت الستارة بسرعه وقعدت على الكنبة وارتحت شويه بعدها دخلت اغسل المواعين
وجهزت هدوم عشان اخد شاور.. واول ما فتحت باب الحمام لقيتها واقفه في وشي بتبرقلي.. ولابسه العباية السوده قفلت باب الحمام بسرعه وصرخت ورميت الهدوم وطلعت اجري عالمطبخ جبت السكينة.. فضلت ادور عالموبايل عشان اتصل بعماد مالقتوش انا ناسياه في الاوضه اللي في وش الحمام وانا مش عايزة اقرب من الحمام وخايفه فضلت قاعدة في الصاله وماسكة السكينة
فضلت مستنية وانا عماله اعيط ومش قادره اخد نفسي لحد ما عماد جه لقاني قاعدة ماسكة السكينة قالي في ايه يا ياسمين ؟ قولتله دخلت الحمام عشان استحمى لقيتها واقفه وبتبصلي.. قالي كفايه جنان بقى ودا كله لسه في الحمام من امبارح يعني دخل بسرعه على الحمام وفتح الباب ونور النور وبعدها جالي مسك السكينة ورماها على الارض وخدني من ايدي ودخلني الحمام قالي هي فين ؟ قوليلي هي فين ؟ جايز دخلت جوة السيفون وانا مش عارف ؟!
فضلت ساكته وبصيت لعماد وقولتله انا مش مجنونه يا عماد انا شوفتها ؟ وقعدت على الارض وفضلت اعيط بعدها عماد طلع واتصل بواحد صاحبه يعرف شيخ قالي بعدها في شيخ هيجي بكره خلاص كده ارتحتي يلا قومي عشان ناكل قولتله مش عايزه اكل حاجه وجريت على اوضتي ونمت على السرير وانا بعيط
بعدها لقيت عماد جايب صنيه فيها الاكل وجه قعد جمبي وقالي يلا عشان انا ميت من الجوع وماكلتش حاجه من ساعة الفطار ومش هاكل من غيرك يلا.. فضلنا ناكل سوى وانا كلت لقمتين وشبعت وعماد كمل بقية الاكل ودخل ينام جمبي
فضلت صاحية ومش جايلي نوم لحد تاني يوم عماد نزل الشغل.. وانا قومت طالعه قاعده عالكرسي جمب الشباك وفضلت باصه بالعند على شباكها وشباكها مقفول.. فضلت كده والنوم كان بيكبس عليا لحد ماقعدت عالكنبه ونمت صحيت على العشا تقريبا.. فاضل ساعه وعماد يرجع
كنت حاسه اني عايز ادخل الحمام فضلت ماسكة نفسي لحد ما عماد يرجع بس ما استملتش خدت السكينة وروحت عالحمام حطيت ايدي عالاكرة بالراحة وفتحت الباب مالقتش حاجه دخلت الحمام وخلصت وطلعت ببص عالصاله لقيتها بتجري في الشقة عندي صرخت ودخلت الحمام تاني وقفلت الباب
وفضلت اعيط انا لو طلعت من هنا مش هرجع الشقه دي تاني انا اتخنقت سامعها عماله تجري في الشقه وتكسر كل حاجه وعماله تدب على الارض جامد فضلت قافله على نفسي في الحمام لحد ما سمعت صوت خطواتها بيقرب من الباب مسكت السكينة جامد وبعدها الصوت اختفى قربت من الباب عشان اسمع كويس سمعت موبايلي بيرن بره كتير فضل يرن وصوت الخطوات اختفى خالص
